Kholetšhi ya Orbit e tswelela go fenya kwa Motsepe Foundation Championship

Shoshanguve: Orbit College e tsweleditse toro ya yona mo Motsepe Foundation Championship ka phenyo ya dino dile pedi go lefela kgatlhanong le Black Leopards maloba. Setlhopa seno sa Bokone Bophirima se fentse metshameko ya sone ele meraro ya pula madibogo mo Motsepe Foundation Championship.

Kholetšhi ya Orbit ene ya tlhatlosediwa kwa Motsepe Foundation Championship mo tshimologong ya setlha sa 2023/2024 go tswa kwa ABC Motsepe League. Ba tlhatlositswe mmogo le setlhopa sa Upington City.

Mo go tse dingwe Maritcburg United e fentse Casric Stars ka dino dile pedi kgatlhanong le lefela kwa lebaleng la Sugar Ray Xulu.

Team of Choice ene ya rengwa ke selepe sa magagane gotswa kwa DStv Premiership morago ga go se dire sentle mo setlheng se se fetileng. Maritzburg United e fentse metshameko ele mebedi le go latlhegelwa ke o le nosi morago ga metshameko ele meraro mo Motsepe Foundation Championship.

Setlhopa sa Baroka ga se se se fenye motshameko mo Motsepe Foundation Championship

Re sa le foo setlhopa sa Baroka se latlhegetswe ka nno ele nosi go lefela kgatlhanong le JDR Stars kwa lebaleng la metshameko la Giant kwa Shoshanguve.

Bakgaga ba santse ba sena phenyo mo metshamekong ya Motsepe Foundation Championship morago ga go latlhegelwa ke metshameko ele mebedi le go tshameka maleka o le nosi mo metshamekong ya bone ele meraro e ba e tshamekileng.

Setlhopa seno sa kwa Limpopo se fologetse tlase kwa Motsepe Foundation Championship kwa bokhutlhong jwa setlha sa 2021/22. Kgabagare setlhopa se le sone eleng sa kwa Limpopo sa Magesi se notile ba La Masia ka nno ele nosi go lefela kwa lebaleng la Dobsonville.

Magesi e fentse metshameko ya bone ele mebedi le go tshameka maleka a le nosi mme ga ese ba latlhagelwe mo setlheng seno, fa University of Pretoria (Amatuks) ba bone phenyo ya nno ele nosi go lefela kgatlhanong le setlhopa sa Milford.